Der Grundsaudaag

English version

In der Braucherei (un aa im Urglaawe) iss der Grundsaudaag en vielgsichtiches Fescht. Es Fescht watt vun sich in der weitere Deitsche Gesellschaft in de Feierlichkeede im Punxsutawney gschpiggelt; dese Feierlichkeede schtehne doch wie en Schadde vun der gedreiliche Bedeitung vum Grundsaudaag.

Die Braucherei verzehlt zu uns, as der 2. Hanning uns darrich en dinnerer Schleier zwische de neine Reich (koerperliche un geischtliche) bschenkt. Die erschde Landwichde (en Wicht = en Wese) erfasse die Gelegeheit, fer vun der Wilde Yacht zerickzukumme. Die Grundsau verdredet sich wie der "yenseitlicher" adder annerweltlicher Iwwerbringer, der (in me Aagschtalt aehnlich wie der Ratatosk uff em Lewesbaam in de Skandinaawische Saage) darrich sei Tunnel rennt. Daer Tunnel hot en Effning in yedem vun de neine Reich. Die Grundsau bringt darum die Bericht vun de annere Reich haer.

Zu eem landwattschaftliche Volk watt es uffkummend Wedder abaddich wichtich; sell gebt, vielleicht, die Ursach, as die Grundsau un ihre Weddervorhersaage noch driwwekumme sinn. Es Wedder iss doch ee gleenes Deel vun seinre Bottschaft. Ennichebber, der bei eem Grundsau-Lodsch am 2. Hanning mol gewest iss, weescht, as die Grundsau zaahlreiche Vorhersaage iwwerliefert. 'S iss vorausgsetzt, as dese Wadde im Schaerz rausgebrocht sinn, awwer etliche Saage zeige aa, darrich es Zeitschnurwaerrick in der Braucherei un in annerem esoterische Gschaff, as die Grundsau aa anschtliche Bottschafte haerbringt.

Es gebt aa am 2. Hanning en Feierlichkeet zu der "Haerdgedderin" (adder "Haerdziebin" im Urglaawe), die iss weiter in Teitonischer Gschicht wie Frigg bekannt. Am 2. Hanning sette mer aa die Schaffekraft vun de Midder un de Weibsleit. Alle Vorgengerinne watt aa geehrt; sell iss iwwereischtimmlich mit de Disir-Sege (en Dis = Idis = en Owwemudder vun re Familye adder Sippe un iss, wuher die "Fee-Geedel" adder in Englisch fairy godmother entschteht), die mer in Skandinaawische un Anglo-Saxische Breich finne kann.

Darrich die Braucherei weess mer, as mer am Grundsaudaag der Feierhard (Feierplatz, Feiereck, Lichterschtock, usw) uffbutze muss. Wann der Feierhard uffgebutzt warre iss, schteckt mer en neies Feier mit re Baerkezweig aa. Wann's en Haapthaerd waehrend der Gemeeschafts-Feierlichkeet gebt, kammer Zinderkaschde benutze, um die Flamm vum Haapthaerd nooch de Heemhaerd vun de Mitmacher zu draage. Yetz denn fangt die Friehlingbutzerei aa, un mer hot vum Grundsaudaag bis die Walpurgisnacht (30. Oschdret/Abrill), fer es Haus in die Ordning zu bringe.

As en Erfolk vun de Weibsleits-Schaffekrafte iss der Butzemann gebore; graad recht iss es besser "widdergebore" zu saage, weil der Butzemann schpringt vun de Iwwerescht vum vergangene Yaahr sei Ern. Es gebt weitleftiche Weihe, wu der Urglaawe hot vun der Braucherei geerbt, in welle der Butzemann wie der Landschirmer ausgschriwwe watt. Er bekummt der Vadder vun de kummende Feldfruchte.

Er bleibt in de Felder bis en Zeit zwische em Erntfescht (21. Scheiding/September) un em Allelieweziel (31. Gehling/Oktower), wann er muss darrichverbrennt warre. Es gebt deel erschtaunliche Gschpichte iwwer Butzemenner, die es Allelieweziel iwwerlewe, awwer dese warre bis en annerer Daag waarde.